مطلع الشمس

نايف سليم


                    1 تعريف:
 أرض البقيعة القبلية اسمها الحرايق وحريقتنا الفوقا قرب باب السوق اسمها مطلع الشمس لأن الشمس تشرق عليها أول مكان في البقيعة.. وكنا نفلحها خلال عشرات السنين كما فلَحها مَن قبلنا مئات السنين.. ولأن حكامنا يحبون أرضنا بقدر ما يكرهوننا فهي الآن مصادرة مثل أغلب أرض بلدنا بحجة أنها أرض صخرية..فلها أقول:


                     2
 يا مطلع الشمس.. وعيون البقيعيات.. هالمتطلعات.. ع تلالها وجبالها العالي
بتبقوا  ببالي   دايماً.. واليوم مثل الأمس.. يا مطلع الشمس.. يا كنز يا غالِ.. وشو غالِ
بتظلّك قبالي وببالي على طول.. مهما العمر يطول.


                              3
 وقديش كنتي مصدر ونبعه.. بالخير درّاره.. يا قمة الروعة.. للعين والبصر سحّاره
 وفي الحرّ والسقعه.. وفي النزله والطلعه.. منقول يا خساره.


                               4
 ومن يوم ما حرّشوكي وسمّوكي الصخريه.. كبرتي بعينيّي.. وِمْكِنتي.. وصرتي عجوز وصبيه وبتظلّك حريقتنا القبليّه.. الحرّه المليحه الطليقه المسبيّه..
 وكل ما بشوف الشمس تزرق عليكي.. واتطلّع.. بتِضوي عينيّي.. وبتروح ما تدمع
 وبفطن بايام الصبا والعزّ..وبتنغّص  وبنهزّ..


                                 5
وإسّا.. لإسّا.. بشوفا وبحِسّا.. إلنا وألف إلنا.. وبهدس.. لعل..وعسى.. وبلكي.. حلمنا؟.


                                6
 وكنا سوا.. وكانت معي.. وكاين معا.. ودقات قلبي بسمعا.. كلما تْلِفّا زوبعه.                .وغيمه توطّي وترفعا.


                                7
وشو بدّي أحكي تأحكي..ع أياما ولياليها؟.. ورايح أبكي.. عالذكريات اللي إلي فيها:
  عشابه وحليشه وحصيده.. وْلَمّ السبل  حبّه ورا حبّه.. برغبه ومحبّه
 وتغمير ورجيده.. وتحطيب.. وبقوّه.. وهمّه ومروّه.. أعاجيب.


                                8
 واليوم من بعد ما راحت.. وراح العمر.. وشُفنا البلاوي الحُمُر
 من بيض بتفنّنوا.. وبجروا حسايب بالسمر.. وبيشَوّفوا نجوم الظهر.


                                  9
 بعدا الحريقه.. وبتظلّها ببالي حقيقه.. قريبه وبعيده
 وكلما الشمس لمعت   عليها.. بتلمع معا فرحه وحسره جديده وشديده.


                               10
وشو عاد هالأيام يطلع بإيدي؟ غير أتطلّع وأتلوّع؟
 ومرات من بعد غصّه وألف تنهيده.. بدل ما أحكي إشي وأشكي:
 بكتب لها - من قحف قلبي  -- قصيده  محزنه... وأتكي !.

السبت 7/10/2017


© كافة الحقوق محفوظة للجبهة الدمقراطية للسلام والمساواة
حيفا، تلفاكس: 8536504-4-972 بريد أليكتروني : aljabha.org@gmail.com

صحيفة الاتحاد: هاتف: 8666301 - 04 | 8669483 - 04 | فاكس: 8641407 - 04 | بريد الكتروني:aletihad.44@gmail.com

* المقالات والتعليقات المنشورة في موقع الجبهة تعبر عن آراء كاتبيها ولا تعبر بالضرورة عن رأي الموقع